21 ASRDA OITS KASALLIGINING OG’IZ BO’SHLIG’IGA TA’SIRI

Abstract

Ushbu ilmiy–tahliliy ish 21-asr sharoitida OITS (Odam immun tanqisligi sindromi) kasalligining og‘iz bo‘shlig‘i to‘qimalari va funksional holatiga ko‘rsatayotgan ta’sirini kompleks yondashuv asosida o‘rganishga bag‘ishlangan. Global miqyosda OIV infeksiyasining tarqalishi davom etayotgan bir paytda stomatologik ko‘rinishlar kasallikning erta belgisi sifatida katta klinik ahamiyat kasb etmoqda. Shu sababli, og‘iz bo‘shlig‘ida kuzatiladigan patomorfologik o‘zgarishlarni to‘g‘ri baholash OITSni erta tashxislash, differensial diagnostika va bemorlarni to‘g‘ri boshqarish jarayonining muhim bo‘g‘iniga aylanmoqda.Tadqiqotda OIVning immun tizimga ta’siri natijasida CD4+ T-limfotsitlar miqdorining pasayishi va bu jarayon og‘iz shilliq qavatining himoya mexanizmlarini qanday zaiflashtirishi ilmiy manbalar asosida tahlil qilingan. Shuningdek, og‘iz bo‘shlig‘ida eng ko‘p uchraydigan klinik belgilardan biri hisoblangan kandidozning yangi shakllari, virus chaqirgan yarali–eroziv jarayonlar, HIV bilan bog‘liq periodontal kasalliklar, tukli leykoplakiya, mushak–biriktiruvchi to‘qima distrofiyalari va tilda kuzatiladigan morfologik o‘zgarishlarning rivojlanish mexanizmlari yoritib berilgan.