M.NÍZANOV – KISHI DRAMALÍQ JANRLAR SHEBERI

Abstract

M.Nızanov – qálemi ótkir qaraqalpaq jazıwshılarınan biri. Ol jazıwshılıq sheberligi arqalı ádebiyat maydanına óz soqpaǵı menen kirip keldi. Sebebi, M.Nızanov dáslep óziniń satiralıq shıǵarmaları menen kózge túsip, keyin ala dóretiwshilik manerasınıń tereńlesiwi menen iri janrlıq shıǵarmalardı da oqıwshılarǵa inam etti. Sonıń menen birge ol jurnalistika tarawında da belgili publitsistikalıq maqalalar menen kózge tústi. Onıń dóretiwshiliginiń tiykarǵı ózgeshelikleriniń biri – jámiyette  júz berip atırǵan unamsız illetlerdi dál aytpastan, onı «sıpayı» túrde mısqıllı súwretlewi bolıp tabıladı. Sonlıqtan, jazıwshınıń hár bir dóretpesinde turmıs shınlıǵı jatır. Jámiyettegi ózgerisler, adamlardıń peyli, olardıń is-háreketleri  dóretiwshi shıǵarmalarınıń tiykarǵı ózgesheliklerine aylanǵan. Atap aytqanda, «Kúlme maǵan», «Eki dúnyanıń áweresi», «Qassapshıǵa jan qayǵı», «Jaqında miliysa ayttı», «Pul joq» hám t.b. dramalıq shıǵarmalarında bul ózgeshelikler ayrıqsha kózge túsedi. Dramaturgtıń qaraqalpaq xalqınıń mádeniyatına, kórkem ónerine qosıp atırǵan jáne bir úlken úlesi onıń kino iskusstvosı tarawındaǵı xızmetleri bolıp, onıń scenariyi tiykarında «Eki dúnyanıń áweresi», «Kulme maǵan», úsh kinokomediyası «Tanka», «Urı», «Kurort», «Qońsılar» filmleri súwretke alındı.